وانا صار لي 15 سنة قرفانة
وانتحارية
حايسة جبدي
لا قياديين يستاهلون
لا شباب يسمع
لا ناس تفهم
ولا اهتمام بشي والبلد ضايعة
السؤال اللي داير في اي عزيمة: "متى بينزلون المنحة الأميرية؟؟
وأخيرا في يوم.. صديق عزيز دزلي مسج
طبعا بلاغة شف كويتية عادي دخلت السايت من غير ما أسأل
انبهرت
شنو هالنظام!؟
شنو هالترتيب!؟
شنو هالروح الحلوة؟؟
والبرتقالي صراحة فظيييييع :-)
كتبت خمس رسايل عني وخمس عن كل واحد بعايلتي
أهم شي شلت "سمو" الرئيس لعدم قناعتي بدستوريتها... كيفي كويتي
بديت حضور التجمعات وانا اتطنز على عمري وأقول
"منتي قرفانة من كل حاجة وجربتي كل حاجة...مش كفاية بقى؟"
"مو وقفنا في تجمعات الأثنين ولامونا على غزو الكويت؟"
"مو وقفنا عشان الأسرى وليلحين الرفات توصل بالقطارة جنا نطر عيالنا؟"
ثاني تجمع حسيت بالفرق!!!! حظي علينا أيام تجمعات الاثنين كنا نروح بعبي. اليوم بنات وشباب نفس العمر نفس المطلب نفس الهدوم ما فينا غريب. حسيت إن أيييييييييييييييييييييي هاذي الكويت! مو المغازلجية اللي في مارينا ولا الكسالى في الوزارات ولاغيرهم اللي يطلعون بالراديو يدشون مسابقات ويطلبون من المذيع "انزين عطني سؤال ثاني"، ولا اللي يدقون على فوزية دريع جنهم يتكلمون من تحت الشرشف!! الله يحلل هيفا وهبي!!!؟؟
أخذني الحماس عاد واستخفيت يوم طقوا الشباب في المجلس
تجننت يوم قالوا أحمد السعدون بطل دونا عن غيره
ضحكت بأعلى صوتي يوم سمعت ناصر الصانع أول شي يعطي مثال عن الكوت بو ستة والباون وبعدين يقول
no no jungle law!
بغيت أنبط وانا أسمع النيباري أول من يبصم على العشرة!!!!!!!!!!!!!؟؟
بس ميخالف! أنا يحق لي إني ما أؤمن بمصداقية فلان وإلا علان
يحق لي ما أحب فلنتان أو بالذات علنتان
لكن ما يحق لي أنسى ليش إحنا تجمعنا
ولا يحق لي أشيش فلان على علان
ولا يحق لي أحسس فلنتان وبالذات علنتان اني ماحبه
كل واحد فينا مختلف
أنا مستانسة أشوف شباب كول.. وغيري يستنكر الجينز على المرأة لما يظهر من عورة!؟
أنا مستانسة إن الشباب يهتفون تسقط الحكومة .. وغيري حاس إنها وايد قوية
أنا مستانسة إن في واحد مثل زورت يبرد جبدي ويخليني أضحك من قلب.. وغيري شايفه حرام وقلة أدب
(على فكرة - موقع زوت zort.blogspot.com)
دام إحنا محترمين خلافاتنا.. مو مشكلة
دام إحنا موجودين نضغط على النواب والقوى السياسية.. هذا المهم
أحلى منظر شفته في عمري من أيام الغزو
بدوي حضري سني شيعي سلفي اخواني ليبرالي بنت ولد ياهل شايب مرة ريال وكل ما يقع بين هالتصنيفات يبي الكويت
يبي الكويت خالية من الفساد
يبي عياله وعيال عياله يعيشون في حماية الدستور اللي سووه أجدادنا عشان نعيش مكرمين معززين
وأول خطوة الخمسة دوائر
والباقي ياي والدرب طويل والشباب نفسهم أطول
12 comments:
thank you hon for this wondeful article.... ur amazing as usual :*
9oot,
merci ya koko rabbina ma3aky
bujwais,
toshkar ya sidi! :-)
7alat el araf tetalla3 el wa7id min hodoomoh :-)
5
5
5
5
5
نرحب بك في عالم المدونات...
أهلاً بكِ في عالم التدوين
مع تمنياتي لكِ بتجربة تدوينية مميزة
ممتازة
نتمنى الاستمرار
Shargawi,
mashkoor o sorry bas 3laimeyya o shaghalt el moderator :-(
ولادة
كله منج ومن شباب الخمس :-)
كله مطقوق
وايد جد؟ لوووول
حاضر وصار
Zort,
it ain't generous. it's just true!
thanx a million
bunaaaaaz,,
o men amthalik yaaaaa mohawwin! :-)
Post a Comment