قصيدة غلط

بقلم الشاعر المجنون: فؤاد حداد

ديوان ميت بوتيك

كان في بلد بتنام وتصحى بتشتكي من أزمة دموع، مخفية عند البقالين، مالية الصفايح واشوله، صححت بالقلم الرصاص، مالية صفايح واشولة واقفاص، رجعت مسحت كان شافني اللي شافني وفز قال لي: سيب وخلي، الكلام ده كلام باطل لا يجوز، ماقلت لوش الوحي عودني على حريته وحريتي أول ما يطلقني النفس يعميني ألقى شمالي في يميني وأمامي وراي واصبح زي ملك الشمس داير مستقيم، سمعته ريقي وقلت قصدك إيه؟ شخط لازم كلامك يبقى خدامك مش إنت الشاعر العمياني والهمياني خدام الكلام. أنا قلت آسف توي واقع من سلالم نور وزهر وكنت باحلم إني ملهم إني ساكن بور سعيد مارحتهاش أبدا وكان جاري نبيل منصور وآسف ياهصور، شايف جمال القافية لما تاخدني وتجيبني، أبوي ضحك لي وابني والجناين شطبت في المغربية وروحتني وريحتني بالسلام والطبطبة أنا راح أعيط ليه من الحسن اللي كان في الحزن والطيبة والاستشهاد وأقول: كان فيه بلد بتنام وتصحى بتشتكي من أزمة دموع