خواطر السفر
أنا من الناس اللي أنتظر إلى آخر لحظة قبل أن أدخل بوابة السفر
أقعد جبال البوابة أشرب قهوتي وأتطمش عالناس
تلاقي الطابور واصل لآآآآآآآآآآآآآآآآآآآآخر الدنيا... والناس تراقب بقلق لا تطير الطيارة وهم واقفين بالطابور
أقعد جبال البوابة أشرب قهوتي وأتطمش عالناس
تلاقي الطابور واصل لآآآآآآآآآآآآآآآآآآآآخر الدنيا... والناس تراقب بقلق لا تطير الطيارة وهم واقفين بالطابور
تيي واحدة شايلة 60 كيس تركض من آخر المطار... توصل البوابة تسوي روحها عيوز ومسكينة... توقف جدام البوابة وطز في الطابور
تدز الأوادم بكياسها وتزحمهم عند الباب... تتقلقص بالعربي
ساعات الضابط عند الباب يستقوي ويطلب منها توقف بالدور
هني في سيناريو من أثنين
يا إما ترقع بالصوت وتستنكر
يا إما تتمسكن ويقلب صوتها مثل شحاتين السيدة زينب
يا إما ترقع بالصوت وتستنكر
يا إما تتمسكن ويقلب صوتها مثل شحاتين السيدة زينب
أما الشخص اللي وراها فهم عنده رد فعلين
يا إما يمد إيده للضابط بالتذكرة والجواز ... ويدزها بكوعه جنه ما يدري
يا يتوسط لها عند الضابط ويتمكسن لها هو الثاني
خاطر يجي في بالي
الشعب العربي كله وبدون استثناءات خالص... يعاني من أنظمة سياسية مطلعة عينه من سنين... ولا يثور
لكن
العربي يشوف طابور... يثور عليه ويرفض يصف ينطر دور
إلا الطابور
أول ما يبدون الركاب يدخلون الطيارة وتخف الزحمة.. أقوم أنا
وهات يا نظرات الاحتقار عاد
نظرات تقول "تو الناس يا برنسيسة... إحنا واقفين من الصبح وانتي ياية آخر لحظة باردة مبردة" ؟؟؟
أما إذا وصلت الكرسي في الطيارة وقعدت... فالناس تعدي علي بنظرة من ثنتين
يا نظرة تقول.. أ أيييييييي وييييييييييي.... أنا قاعد جدامك
يا نظرة تقول... عششششششششششتو... كاشخة يعني تقعدين جدامي؟؟
أخيرا توصل الطيارة
وطيارة القاهرة تحديدا... الناس توقف أول ما الطيارة تلمس الأرض
مساكين المضيفين... أول شي يطلع إعلان محترم على الميكرفون
يرجى من جميع السادة الركاب ملازمة أماكنهم حتى تتوقف الطائرة بالكامل ويتم إطفاء إشارة ربط الأحزمة.. وذلك حفظا لسلامتكم وسلامة الركاب
الركاب يطنشون... اللي ينزل كيس الرفاعي واللي ينزل كيس بن العمدة أو كيس المحاميد
يستفز أحد المضيفين فيبدا يصرخ.... لو سمحت... لو سمحت... إقعد لو سمحت... حجية قعدي لو سمحتي
فتخف الحركة شوية... وأول ما توقف الطيارة... يتراكض الركاب كلهم على باب الطيارة
أموت أفهم شمستعيلين عليه!!!!!!!!؟؟؟
ما علينا... هذا كله ما يضايقني
نظرات الكويتيين.... ما بين الاحتقار.. وشي ثاني مادري شنو
يطلون عليك وانت قاعد كأنك ناسي تلبس بنطلونك مثلا؟
هذا اللي يضايقني
فتعلمت... من اليوم ورايح... من لحظة دخول المطار إلى الخروج منه
ما أرفع راسي
الأرض حلوة... ما شبو شي
ملاحظة: كم سنة صار لنا نطير بهذا الشكل التقليدي؟ متى بتتغير التكنولوجيا؟
17 comments:
سؤال وجيه اي والله متى
انا اكره الطيارة و الطيران من اول ما تدخل المطار لين توصل الهوتيل بالديرة اللي رايحلها
اكره كل لحظة
كل لحظة
أضم صوتي لصوت مطقوق
من تزوجت وآنا أكره المطارات والطيران لأن زوجي يأخذنا قبل الطيارة ب 3 ساعات ويكون متوتر وما نقدر انكلمه إلى أن نصل أوتيل البلد اللي طايرين لها
كل مرة نسافر أحلف وأكفّر إني ما راح أسافر معاه...وبعدين أنسى
أمانة ذكريني أرفانة الله يعافيك
أما عن الطيران بتكنولوجيا مختلفة فيا ريت ما نبي مطارات لو تمرنا الطيارة مثل الباص وكل طيارة فيها 20 راكب مو أكثر
الحين من كلامج يعني العيب مو بالطياره ولا بشركه الطياران , العيب فينا احنا صح؟:)
الاخلاقية العربية لم تتغير .. لا جديد
حاولى تسلى نفسك باى شىء كتاب مثلا
عادي اللي يسافرون الى هذه دائما سلوكياتهم فوضى
:) الحمدالله على السلامة وافتقدنا المشاغبات
:)
بارك الله فيك
.
.
كلام في عين الواقع ويلامس الحياة اليوميه بالمطار
.
حيقيقة استغرب من الأمور التي تحدث
قبل الإقلاع وخلال أجواء الطيارة وبعد الوصول إلى الجهه المطلوبة
.
أما التكونولوجيا فلا نستطيع ان نقول شيء عنها
ولكن أجملها عند الإقلاع
.
دمت بخير
.
eng_q8
أولا نورتنا... ثانيا.. أنا مستعدة أتسلف وأمول مشروع بقيادة مهندسين كويتيين يبردون القلب زي حلات حضرتك كده.. مقابل تشوفون لنا حل
مطقوق
لا مو كل لحظة.. أحب لمابطني يعورني لما تلمس الطيارة الأرض
برة الكويت
مو لما ترجع الكويت
ولادة
أوووووه زوجك من هالنوع؟؟؟ أختي من هالنوع ونوتر بعضنا في السفر
مابي باص.. أبي ترانسبورتر مثل اللي في ستار تريك
فكرة الترانسبورتر إنه يفكك ذرات الجسم وينقلها بسرعة مضاعفةمن سرعة الضوء ويعيد تجميعها عند الوصول
تخيلي؟
يعني لو ذرة واحدة تضيع... توصلين تلاقين ريولك عند راسك وخسمك عند إيدك؟
لوطن أجمل
العيب فينا أولا.. وفي الطيارة ثانيا.. وفي شركة الطيران كمحصلة طبيعية لوول
محسد
والأخلاق الكويتية في تدهور مخيييييييف وأسرع من التكنولوجيا
سعود
ما بقى كتاب ولاب توب وسودوكو... لكن .. لازم نخلي وقت للطماشة
mok
اللي يسافرون الى هذه؟
هذه؟؟؟؟؟
القاهرة صارت هذه؟؟؟؟؟؟؟؟؟
أنا دائمة السفر إلى "هذه"... ومن أكبر عشاقها
نعم أنا فوضوية ومشاغبة
أما الكويتيين وتعاملهم مع "هذه" فهو يثير قرفي وبشدة
الوجد
نورت البوست
والله إن في سوالف وايد عن المطار بس ما حبيت أطول أكثر من جذيه
من أكره الأشياء في المطار نظرات بعض الضباط الكويتيين وتعليقاتهم
ما يستحون والله
بعضهم حتى تعاملهم مع السواح والزوار يفشل
اضم صوتي لمطقوق
ولايصير اكو ياهل بالطياره
انا وحدة مالي شغل باحد
اتسوق
اشرب قهوتي
انظر بالدور
اقعد على كرسيي
واستمتع بكل لحظة
طبعا الي معاي
زوجي حالتة حالة
وولدي شوي ويرجع
وبنتي تقلب من فلم لي الثاني
لما نوصل بالسلامة
بس سالفة الناس والفوضى
ماركة مسجلة ما تتغير لو يغيرون التكنلوجيا ويصير السفر بالمايكروويف
لج تحياتي:منال
حمودي
الياهال لازم يحطونهم بطالق ثاني مع أهلهم وخداماتهم
منال
نورتي البوست
ما شاء الله وايد بلوجرز يدد هالمرة
:-)
أتمنى ما يكونون عيالك من النوع اللي يبكي عند الإقلاع والهبوط
أو من النوع اللي يركضون في الممرات وبالذات لما تعدي عربانة الأكل
الله يعينك
:-)
Post a Comment