الحلزونة – لفؤاد حداد

بمناسبة الجو الجميل... واقتراب فالنتين ومناسبات أخرى.... أهدي كل الحبيبة مقاطع أحبها من قصيدتي المفضلة لفؤاد حداد... الحلزونة


فجأة لقينا الليل بيشتي نهار
والأرض بلبل والسما فرجة
وان كان محدش سامعه بيغني

بين المراوح وقفت العربية
الضي شعشع والشجر سلويت

أنا وحبيبتي في قميص بأكمام

عينيها ترعش من جمال المنظر

بلعت ريقي ييجي ميت مرة
وكل مرة ينقطع صوتي
بذلت مجهود الجبابرة وأخيرا

قلت لها خليكي هنا ويايا
حتروحي فين ويا الهوى وياه
قالت لي ياه
قلت لها يايا ويايا
واحنا بقينا في آخر الدنيايا
والزنبلك داير على الفاضي

اتلفتت لي المستبدة اللطيفة
وخدها بينطر دموع مش نازلة
والحب أرحم لما يبقى مغازلة

قالت لي عيب بدل الموتور والمحرك
يا عم يا شاعر تقول زنبلك لك
سنتين بقى لك في المعاني تلكلك
وتنشغل باللفة والأسلوب
والتعلب المكار أبو التعلوب

دخانك اسود يبقى قلبك شايل(....)
لكن حاسيب حضني في حضنك مايل
اكمنش التفكير في حل المشاكل
دا هم طيب من هموم الحياه

قلت لها ياه
قالت لي يايا ويايا
واحنا بقينا في آخر الدنيايا
والزنبلك داير على الفاضي

رديت كأني من بعيد مش سامع
يا لابسة من تحت الودع تنوره
معسلة زي القمر في الشمس
يام الليالي الهاطلة المشمورة
ياريتني أعمى أشربك باللمس
والا أشمك من بيار الأمس
قالت حتقلب جد يا مسكين
قلت لها أستاهل حدود الموت

بكا شفايفي من شفايفكم(....)
غاوي العطش أفضل أشم الليل
والا أموت الظهر شايفكم

قالت لي غني يا ولد شامي
وغني مصري يا ولد مصري
إرفع لفوق البرج أعلامي
وتعالى بين الضفتين قصري
أتاريني جني وهي جنايه
قالت لي ياه
وانا قلت يايا ويايا
واحنا بقينا في آخر الدنيايا
والزنبلك داير على الفاضي
(....)