قصيدة البتاع

أحمد فؤاد نجم

يا اللي فتحت البتاع ..

فتحك على مقفول ..

لأن أصل البتاع ..

واصل على موصول .

.فأي شيء ف البتاع ..

الناس تشوف على طول ..

والناس تموت ف البتاع ..

فيبقى مين مسئول؟ ..

وازاي هتفتح بتاع ..

ف وسط ناس بتقول ..

بإن هذا البتاع ..

جاب الخراب بالطول ..

لأن حتة بتاع ..

جاهل غبي مخبول ..

أمر بفتح البتاع ..

لأنه كان مسطول! ..

وبعد فتح البتاع ..

جابوا الهوا المنقول ..

نكس عشوش البتاع ..

وهد كل أصول ..

وفات ف غيط البتاع ..

قام سمم المحصول ..

وخلى لون البتاع ..

أصفر حزين مهزول ..

وساد قانون البتاع ..

ولا علة ولا معلول .

.فالقاضي تبع البتاع ..

فالحق ع المقتول ..

والجهل زاد ف البتاع ..

ولا مقري ولا منقول ..

والخوف سرح ف البتاع .

.خلى الديابة تصول ..

يبقى البتاع ف البتاع ..

والناس صايبها ذهول ..

وان حد قال دا البتاع ..

يقولوا له مش معقول ..

وناس تعيش بالبتاع ..

وناس تموت بالفول ..

وناس تنام ع البتاع ..

وناس تنام كشكول ..

آدي اللي جابه البتاع ..

جاب الخراب مشمول ..

لأن حتة بتاع ..

مخلب لراس الغول ..

باع البتاع بالبتاع .

.و عشان يعيش على طول ..

عين حرس بالبتاع ..

وبرضه مات مقتول ..